पावसाळा २००८च्या 'भाषा आणि जीवन'मध्ये सत्वशीला सामंत ह्यांचा 'प्रचलित शासनमान्य लेखन-नियमावली : काही मतभेद' हा लेख प्रसिद्ध झाला आहे. त्यात, शुद्धलेखन नियम ५ संबंधातील विवरण करताना संदर्भ म्हणून 'ज्ञानेश्वरीची प्रस्तावना' आणि 'ज्ञानेश्वरीतील मराठीचे व्याकरण' ह्या ग्रंथांचा उल्लेख करून त्यांचे संपादक कै० वि०का० राजवाडे आणि कै० शं०गो० तुळपुळे असा उल्लेख करण्यात आला आहे. त्याचप्रमाणे, पुढे कै० मो०के० दामले ह्यांचाही उल्लेख करण्यात आला आहे. लेखक-संपादक वगैरेंचा उल्लेख करताना 'कै०' लिहिणे कितपत योग्य आहे? ग्रंथलेखन वा संपादन करताना ही मंडळी हयात होतीच. त्यामुळे, आणि 'कै०' ही काही 'प्रा०', 'डॉ०' सारखी उपाधी नसल्यामुळे तसा उल्लेख करू नये असे मला वाटते. ह्याबाबत शंकानिरसन करावे अशी विनंती आहे. —

विजय पाध्ये